Kategoria e Parë ka dhuruar ndryshime trajnerësh që në javët e para të saj dhe një nga klubet që kishte bërë lëvizje në pankinë ishte edhe Oriku.
Klubi largoi Sherif Idrizajn pas startit të dobët të kampionatit dhe nisi kërkimin për një emër të ri që të ulet në pankinën e vlonjatëve.
Emri i zgjedhur ishte trajneri i njohur Gerd Haxhiu, i cili ka pranuar ofertën dhe sot është prezantuar si drejtuesi i ri në pankinë e ekipit.
NJOFTIMI I KLUBIT
“Gerd Haxhiu merr timonin e KF Orikut!
Klubi i Futbollit Oriku njofton zyrtarisht arritjen e marrëveshjes dhe emërimin e teknikut vlonjat, Gerd Haxhiu, në krye te pankinës sonë.
Klubi ka arritur dakordësinë e plotë me trajnerin e njohur, i cili zyrtarizon sot bashkëpunimin dhe do të nisë menjëherë punën në krye të ekipit për përgatitjen e sfidave të radhës.
Haxhiu vjen me një bagazh të pasur përvoje dhe një karrierë të gjatë në elitën e futbollit shqiptar, si në Superligë ashtu edhe në Kategorinë e Parë. Përvoja e tij, disiplina dhe njohja e mirë e futbollit vendas do të jenë një aset i çmuar për të udhëhequr djemtë tanë drejt objektivit të këtij sezoni.
I urojmë trajnerit Gerd Haxhiu mirëseardhjen në familjen tonë dhe shumë suksese ne këtë rrugëtim të ri!
