Flamurtari dhe Burreli kanë barazuar me rezultatin 1-1 në përballjen e luajtur ditën e sotme në qytetin e Vlorës.
Sfida u mbyll në mënyrë dramatike, duke u dhënë të dyja skuadrave nga një pikë. Ndonëse vendasit e dominuan lojën dhe krijuan më shumë raste për shënim, të parët që kaluan në avantazh ishin miqtë.
Burreli gjeti rrugën e rrjetës në minutën e 69-të me anë të Xhabrahimit, i cili u tregua i saktë nga pika e bardhë e penalltisë. 11-metërshi u akordua nga gjyqtarja kryesore e kësaj përballjeje, Emanuela Rusta.
Pas pësimit të golit, Flamurtari u hodh me të gjitha forcat në sulm për të kërkuar barazimin. Përpjekjet e kuqezinjve u shpërblyen vetëm në minutën e gjashtë të shtesës, kur Pjeshka tundi rrjetën dhe siguroi pikën për ekip e tij.
SHIKONI KLASIFIKIMIN: RENDITJA NË KATEGORINË E PARË
Ky është barazimi i dytë radhazi për Flamurtarin, pas atij me Besën.
