Kërkohet kthesa, dy mungesa të rëndësishme te Vllaznia

Vllaznia po përgatitet për ndeshjen e radhës ndaj Teutës mes mungesave të rëndësishme në përbërje.

Pas humbjes 2-0 me Laçin, trajneri Edi Martini duhet të bëjë llogaritë pa disa lojtarë kyç. Mesfushori Adnard Mehmeti do të mungojë për shkak të kartonit të kuq të marrë në ndeshjen e fundit.

Kjo mungesë e detyruar i heq stafit teknik një opsion të rëndësishëm për repartin e mesfushës. Ndërkohë, anësori Lirim Kastrati vazhdon të mbetet jashtë fushave prej më shumë se gjashtë muajsh për shkak dëmtimi.

Lojtari kosovar po ndjek një proces të kujdesshëm rikuperimi dhe pritet t’i bashkohet ekipit gjatë muajit tetor. Stafi mjekësor nuk dëshiron të rrezikojë me rikthimin e tij para kohe në ndeshjet zyrtare.

Mungesat e ndryshme e ndërlikojnë situatën te Shkodranët, të cilët kërkojnë reagimin e menjëhershëm pas startit negativ.