Elseid Hysaj mund të vijojë karrierën në futbollin italian, teksa në garën për shërbimet e mbrojtësit shqiptar është futur edhe Ascoli.
Pas interesimit fillestar të Lecce-s, klubi i Serie B ka paraqitur një ofertë konkrete për 32-vjeçarin. Megjithatë, propozimi i parë nuk ka bindur Hysajn, i cili e ka refuzuar për arsye ekonomike.
Pavarësisht këtij zhvillimi, negociatat nuk janë ndërprerë. Shkodrani mbetet i hapur për një transferim te Ascoli, ndërsa drejtuesit e klubit po vijojnë komunikimet me futbollistin, në përpjekje për të gjetur kushtet që mund ta bindin shqiptarin.
Ascoli e konsideron Hysajn një profil të rëndësishëm për krahun e djathtë të mbrojtjes, veçanërisht pas dështimit të tratativave për Hans Hateboer.
Eksperienca e shqiptarit shihet si një avantazh i rëndësishëm, ndërsa eksperienca e tij është një tjetër element që ka tërhequr vëmendjen e klubit.
Hysaj mund të aktivizohet si në të djathtë, ashtu edhe në të majtë të mbrojtjes.
Në garë nuk janë vetëm klubet italiane. Për Hysajn raportohet interes edhe nga disa skuadra jashtë Italisë, kryesisht në Rusi, duke e bërë situatën më të komplikuar dhe duke rritur konkurrencën për shërbimet e tij.
Mbrojtësi shqiptar është një nga futbollistët më me përvojë të Kombëtares kuqezi. Hysaj numëron 99 ndeshje dhe 2 gola me Shqipërinë, ndërsa vlera e tij aktuale në Transfermarkt llogaritet rreth 1.2 milionë euro.
Çështja ekonomike duket se është pika kryesore e negociatave, ndërsa konkurrenca nga klubet e tjera mund të ndikojë drejtpërdrejt në të ardhmen e mbrojtësit shqiptar.
