Skuadra e Vllaznisë ka nisur stërvitjet nën drejtimin e teknikut Ergi Borshi pas largimit të trajnerit Edi Martini.
Ish-mesfushori i kuqebluve ka marrë përsipër drejtimin e ekipit në këtë periudhë tranzicioni. Pavarësisht zhvillimeve, klubi shkodran ende nuk ka nxjerrë një njoftim zyrtar për ndërprerjen e bashkëpunimit me Martinin.
Kjo situatë e paqartë ngjason me ngjarjet e ndodhura më parë te Tirana me teknikun Orges Shehi. Atëkohë, çështja përfundoi në dyert e gjyqit ku tekniku doli i fituar përballë pretendimeve të klubit bardheblu.
Kontrata aktuale e Edi Martinit me Vllazninë është e vlefshme deri në verën e vitit 2028. Një prishje e njëanshme e kësaj marrëveshjeje do t’i kushtonte klubit dhjetëra mijëra euro dëmshpërblim.
Te Vllaznia janë përfolur disa emra për stolin, ndërsa po shqyrtohet mundësia që Borshi të qëndrojë si trajner i parë.
