Rezultatet e raundit të dytë në Ligën e Kombeve e kanë pozicionuar Shqipërinë të vetme në krye të grupit dhe në kontroll të plotë të fatit të saj.
Kuqezinjtë gëzojnë tashmë një avantazh prej dy pikësh ndaj Finlandës, me të cilën do të përballen këtë fundjavë në një duel përcaktues.
Sipas simulimeve të fundit nga superkompjuteri i “Football Meets Data”, shanset e Shqipërisë për të mbyllur grupin në vendin e parë kanë kërcyer në 72.4%. Gjithashtu, mundësia për t’u ngjitur në Ligën B ka arritur në një shifër prej 82.9%, duke e bërë këtë objektiv thuajse të sigurt.
Fitimi i grupit sjell dy bonuse për rrugëtimin drejt Kampionatit Evropian 2028. Së pari, ky sukses garanton minimalisht një vend në fazën play-off të kualifikueseve të turneut evropian.
Së dyti, vendi i parë i siguron kombëtares kuqezi pozicionimin në vazon e tretë gjatë hedhjes së shortit. Në krahun tjetër, mbyllja e grupit në vendin e dytë do ta zbriste automatikisht Shqipërinë në vazon e katërt, duke vështirësuar ndjeshëm rrugëtimin.
