Agim Zeka është përforcimi më i ri i skuadrës së Drenicës për edicionin e ri në Superligën e Kosovës.
Sulmuesi 28-vjeçar vendosi të mbyllë bashkëpunimin me spanjollët e Real Murcia për t’u rikthyer në futbollin kosovar. Me klubin e tij të ri, Zeka ka nënshkruar një kontratë 1-vjeçare, e cila do ta mbajë të lidhur deri në verën e vitit 2027.
Ky është një rikthim për të në mjedisin e Kosovës, pasi më parë ka veshur fanellat e Prishtinës, KEK-ut, Dritës dhe vetë Drenicës. Për më tepër, 28-vjeçari është një emër mjaft i njohur edhe në kampionatin shqiptar.
Gjatë karrierës së tij në Superiore, ai ka luajtur për Skënderbeun, Erzenin dhe Partizanin. Paraqitjet e tij bindëse me fanellën e “të kuqve” i siguruan në atë periudhë edhe ftesën me Kombëtaren shqiptare.
