Kapiteni Amir Rrahmani ka njoftuar pensionimin nga përfaqësuesja e Kosovës pas 10 vitesh pjesë e saj.
Qendërmbrojtësi i Napolit e bëri publik vendimin përmes një postimi në Instagram, ku deklaroi se nuk do të jetë më pjesë e Kosovës për sa kohë Federatën e Futbollit të Kosovës e drejtojnë personat aktualë.
Rrahmani tha se vendimi lidhet me kundërshtime të vazhdueshme, mungesën e njerëzve kompetentë për të trajtuar problemet dhe ankesat e lojtarëve, si dhe me sulme që, sipas tij, kanë vazhduar për më shumë se dy vite.
“Tifozë të vërtetë të Kosovës. Pas 10 viteve në Kombëtare nga të cilët 7 vite si kapite ju njoftoj se nuk do të jem më pjesë e Kombëtares së Kosovës, përderisa FFK-në e udhëheqin personat aktual.
Për shkak të shumë faktorëve, kundërshtimeve të vazhdueshme dhe mungesës së njerëzve kompetentë për të adresuar problemet dhe ankesat tona, situata ka mbetur pa përmirësim për shumë vite.
Dhe çka mora në këmbim? Sulme të vazhdueshme dhe të koordinuara për më shumë se dy vite nga ata të cilët do të duhej të na mbronin. Drejtësia do ta vërtetojë një ditë.
Ky vendim vjen nga nevoja për ta ruajtur integritetin tim si kapiten dhe futbollist profesionist, por mbi të gjitha vlerat e mia si njeri”, shkruan Rrahmani.
Amir Rrahmani ishte pjesë e Kosovës që nga viti 2016, ku kaloi nga kombëtarja e Shqipërisë, teksa në shtatë vitet e fundit, pas pensionimit të Samir Ujkanit, ai ishte kapiten i Kosovës.
